काही महिन्यांच्या उपासानंतर जंगलात फिरायला जायचं ठरलं. आज उद्यात तारखा ठरवू म्हणत माणसं ठरेपर्यंत दोन आठवडे गेलेच पण १६-१९ नोव्हेंबरला भाचेकंपनीसकट १० जण ताडोबाला जायला गोळा झालो.
ताडोबा आणि अंधारी अभयारण्याचं (Tadoba and Andhari Tiger Reserve - TATR) मुख्य वनक्षेत्र (core) हे ६२५.४ स्क्वेअर किलोमीटरचं आहे. आजूबाजूचं काही (buffer) क्षेत्र मिळून एकूण क्षेत्र साधारण १७२७ स्क्वेअर किलोमीटरचं आहे. कोअर भागात जाण्यासाठी कोलारा, नवेगाव, मोहारली गावातून दारे आहेत. बफर भागात जाण्यासाठी, कोलारा, पळसगाव, अलिझंझा ही प्रवेशद्वारे आहेत. आणखीही काही प्रवेशद्वारे आहेत पण वरील प्रवेशद्वारे प्रामुख्याने वापरली जातात. कदाचित या दारांपासून एका वेळी आत जाऊ शकणाऱ्या गाड्या जास्ती असल्याने किंवा या ठिकाणी पोहोचणं त्या मानानी सोपं असल्यामुळे तसं असावं.
